Два распродадени концерти за кратко време е билансот по најавата за враќање во Македонија на сцената заедно на Дуке Бојаџиев, Крсте Роџевски и Исмаил Лумановски. Вечерва и утревечер во 19.30 часот на сцената на Филхармонијата, ќе имаме можност да слушнеме авторски композиции и преработки на македонска изворна музика, во едно ново уникатно издание, со интимен карактер и модерна аранжманска структура и изведба.
– Секогаш се радувам и уживам кога правам концерти во Македонија, најслатки и најинспиративни ми се. Двата концерти се комплетно распродадени и верувам дека ќе биде вистинско уживање како за публиката, така и за нас – изјави Бојаџиев в очи првиот концерт, за Умно.мк.
Извонредниот талент на Дуке Бојаџиев, Крсте Роџевски и Исмаил Лумановски одамна ја има својата потврда на светската сцена, а нивните имиња се запишани и зад едни од најраскошните, маестрални концертни доживувања кај нас. Покрај меѓународниот успех и соработки, како музички уметници и автори, нив ги поврзува безвременоста на музиката која ја создаваат со фантастичен сензибилитет и оригиналноста во нивните беспрекорни изведби.
Илјадници луѓе ширум светот кои веќе имале прилика да присуствуваат на нивните секогаш распродадени концерти можат да го потврдат фактот дека станува збор за настапи кои се единствени по својата природа, виртуозност и квалитет.
